القائمة الرئيسية

الصفحات

أحدث الأخبار

عمل خبز التورتيلا والخبز العربي

الخبز العربي 
المقادير
- كيلو دقيق 
- 2 معلقة كبيرة خميرة 
- معلقة كبيرة سكر 
- نصف معلقة صغيرة ملح
- 2 معلقة صغيرة زيت زيتون (اختياري) 
- الماء : حسب الحاجة (للعجن) 
طريقة التحضير:
- في طبق كبير حطي الدقيق والخميرة والسكر والملح وزيت الزيتون واخلطيهم وضيفي الماء بالتدريج واعجني كويس لحد ما تحصلي على عجينة متماسكة.
- غطي العجينة وخليها في مكان دافي لمدة ساعة.
- قسمي العجينة كرات متوسطة الحجم وغطي كل كرة بالدقيق وخليها ترتاح حوالي ربع ساعة.
- حمي الفرن على درجة حرارة 200 وثبتي الرف الشبكي وسط الفرن.
- افردي العجينة على رخامة مرشوشة بالدقيق باستخدام النشابة بسماكة 1 سم.
- حطي العجينة في الصواني مع ترك مسافة 1 بوصة بين كل قطعة والتانية ودخليها الفرن على الرف الوسطاني حوالي 5 دقائق.
- وممكن تسخني طاسة تيفال كبيرة وتحطي فيها رغيف الخبز وسويه فيها لحد ما يتحمر شوية واقلبيه على الوش التاني.

خبز التورتيلا 
المقادير:
 - 3 كوب دقيق لجميع الأغراض
 - معلقة صغيرة ملح
 - نصف معلقة صغيرة بيكنج بودر
 - ثلث كوب زيت زيتون أو زيت نباتي
 - كوب ماء دافي للعجن
طريقة التحضير:
 - اخلطي الدقيق والملح والبيكنج بودر لحد ما يمتزجوا مع بعض كويس.
 ضيفي الزيت وافركي وبعدين ضيفي الماء واعجني حتى لحد ما تحصلي على كرة متماسكة ويتم امتصاص كل السوائل، ولو كانت العجينة لزجة معاكي ضيفي المزيد من الدقيق بمقدار معلقة كبيرة في كل مرة حسب الحاجة. (يجب أن تكون العجينة طرية وناعمة من حيث الملمس).
- انقلي العجينة على رخامة مرشوشة بالقليل من الدقيق. وقسميها لـ 16 قطعة متساوية.
- اقلبي كل قطعة وغطيها بالدقيق وشكلي كل قطعة على شكل كرة وافرديها بكف ايدك.
- غطي كرات العجين المسطحة بفوطة مطبخ نظيفة وخليها ترتاح لمدة نصف ساعة على الأقل.
- سخني طاسة تيفال على نار متوسطة. افردي وشكلي كل قطعة عجين على شكل دائرة.
 - حطي دائرة عجين واحدة في الطاسة وسيبيها تستوي لمدة دقيقة أو لحد ما يظهر على الجزء اللي تحت بقع بنية والسطح اللي فوق يعمل فقاعات.
- لو تحمر اللون بسرعة، قللي النار شوية. ولو خد أكتر من دقيقة لرؤية بقع بنية ذهبية على الجزء السفلي من التورتيلا، زودي النار شويه.
- اقلبي على الوش التاني وسويه لمدة 15-20 ثانية. لازم التورتيلا تكون لطيفة وناعمة ولكن فيها بعض البقع البنية الصغيرة على السطح زي الصورة كده.
- ارفعيها على قطعة قماش نظيفة وغطيها وكرري العملية لحد الانتهاء من الكمية.
 - ممكن تخزينها في طبق محكم الغلق أو في كيس في درجة حرارة الغرفة لمدة 24 ساعة أو في الثلاجة لمدة تصل لأسبوع واحد.
للتجميد ، افصلي التورتيلا عن بعضها بورق زبدة أو ورق مشمع وحطيها في كيس وبعدين دخليها الفريزر.
ملحوظة: متخليهوش ياخد لون بني جامد عشان ماينشفش منك ويتحمص وأهم حاجة تغطية بفوطة كويس اول ما ترفعيه عن النار عشان يبقى طري معاكي.